「轉白人:대완囝에經驗」(轉白人:Tâi'oân 囝 ê 經驗)

幾 lō 工前,北 Bí 洲 hit pêng ê 朋友寫 phoe hō͘ 番,講: 「今年 goán cia cit ê Tâi'oân 人團結戦綫 beh 辦一 ê 討論會,題目 sī〈Becoming Americans: the Taiwanese Experience〉。我 cai'iáⁿ ce 及汝 beh 搬轉去 Asiā ê 人 sī 無 saⁿh 合,m̄ koh citmá sī 世界村,人 ê 界定及認同無一定 sī pē 母 hō͘ lán ê...」

Becoming Americans: the Taiwanese Experience翻做 hōló 話 to̍h sī〈変做 Bí 洲人:Tâi'oân 人 ê 經歷〉,mā 会駛翻做〈変做 U.S.A. 人:Tâi'oân 人 ê 經歷〉,mā 会駛翻做〈変做北 Bí 紅毛:Tâi'oân 人 ê 經歷〉 番本來 mā sī hit pêng ê 人,番 cai,in 会 kā 汝講 in sī beh 討論変 U.S.A.(花旗 á)人 hit 層代誌。M̄ koh 変花旗 á 人本底 sī 一項考公民、the̍h 身份 ê 代誌 niā'ā。Ah in beh 講 ê「becoming Americans」絕対 m̄ sī hit phâng 考公民、the̍h 身份 ê 手續。其実 in beh 講 ê sī 一種風俗及認同 ê 轉変,to̍h sī hiaⁿh 白人 ê 衫來 chēng、煮白人 ê 飯來食、放白人 ê 歌來听、学白人 ê 腔口來講話。In teh 講 ê to̍h sī 用白人 ê 観点來讀歷史、拜白人 ê 公嬤做 lán 家己 ê 公嬤、扶紅毛 lānpha 講 he sī 種族平等。

花旗 á 国 kám m̄ sī 白人 teh 做主?

一九六〇年代 ê 烏主運動(Black Power movement)to̍h sī beh hō͘ 烏人 mā 会 tàng 做主,m̄ sī 講 kanna 烏人 khah 会 tàng 做主 hiahni̍h 壓霸 lah,意思 to̍h sī beh hō͘ 烏人、白人 lóng 家己做主 to̍h tio̍h ahlah。路尾,白人做主 ê 花旗 á 国家政府 sī 真不擇手段,決心一定 ài hō͘ cit ê 烏主運動死 kah 無聲無說。Why

花旗 á 国 citmá ê 総統 sī 烏人、白人透濫 ê,無 m̄ tio̍h。M̄ koh 普通時,花旗 á 国 nā 無 teh 戦爭 ê 時,in 総統哪有 thang 做主?

兄姊,汝 kā 看 māi,北 Bí 洲資本界 ê 大人,有幾 ê m̄ sī 白人?

本來逐 ê lóng 講 beh tàu hoāⁿ hit 号「烏白主」運動,to̍h sī 種族平等、逐 ê 做主,kàu taⁿ iáukoh sī 白人 teh 做主,lán soah 已經听着一四界 pho̍kgá 聲,真 cē 人講北 Bí 洲 ê 種族已經平等 ah。

Lán 黃 á 人及烏人無 saⁿh kâng。Lán m̄ 免爭取種族平等 mā 会駛(ēsái)。因為 lán m̄ sī 烏人,尤其 lán Tâi'oân 人大部份 lóng 白 phauphau ê,所以 lán 会 tàng 申請 hit 号「轉(tńg)白人」ê 権利,lán nā 奈心好禮 á 等待,piàⁿ phāⁿ 紅毛七 á,choē in tàu 生 Tâi'oân 囝,後 pái lán to̍h 会変做 in ê 人,in mā 会変做 sī lán 人,逐 ê 窗 á 門緊関 hō͘ 密,做伙來
chi̍hchu̍h cit ê「烏人問題」!








王盛德生做縁投 sī 無 tè cèⁿ ê,番 bē pháiⁿ 勢寫 ce。









紅毛 ê teh 做主 to 紅毛 ê teh 做主,he mā 無要緊,番 sī beh tàu kēng hit 種「番主運動」to̍h tio̍h ahlah,無 to̍h mài 叫番 sī 番,改叫紅毛屎 to̍h 好。Lán Amélikā ê 鄉親 nā beh 去「轉」白人,he mā 據在 in 家己去 hoa̍t 落... 番 teh ioh,lán 隨時 koh 会听着 in teh khàuchan 講 he 白人 iáu kā in 当做 sī 番 á teh 處理,hō͘ in 真怨 cheh,ah 人 to 已經 ciah piàⁿ 勢 teh「become American」ah...

世界庄 to 世界庄,番 to̍h sī 世界番,汝 nā cai'iáⁿ 世界社 tī tó,後 pái lán sio 招、sio 載來去。

4 則留言

  1. Ai theh chit tiuN ge-bun oah-tang pian-kai chit--e. Na u 7thak chit tiuB ge-bun oah-tang e kong-ko, chiu e liau-kai, ka Becoming American" hoan-ek cho "tng peh-lang" si m-tioh--e.

    "What does it mean to become American? What is lost or gained, both personally and culturally, when one sheds part of one" heritage to make way for a new identity?"

    回覆刪除
  2. 頂 koân siōng 尾段,番來 kā 翻譯一下:

    所謂 ê「変成 Amélikā 人」,he sī símmih 意思?無論個人 hit 方面 ahsī 文化方面,lán nā 放 sak lán 公嬤 ê 傳統 ê 一部份來準備 beh sa 一 ê 新 ê 自我認同 ê 時,所失去 ê sī saⁿh?所得着 ê sī saⁿh?

    回覆刪除
  3. 此留言已被作者移除。

    回覆刪除
  4. 像頂 koân hit ê 朋友所講 ê,「Amélikā 人」及「白人/紅毛 ê」m̄ sī kui 百 pha sio kâng ê,所以,番翻了無講百分之百的実。

    M̄ koh,番有 beh 問北 Bí 洲 ê 所謂 ê「Tâi Bí 人」:

    第一,in 去 kàu hit ê「文化多元」ê 北 Bí 洲,sī áncoáⁿ in 無論 tang 時 ah tó 一項 to beh 学白人 ê 看法、講法、做法。

    第二,既然 in 中間九十 pha ê 人 tī 九十 pha ê 都合 lóng toè 白人 teh 行,甚至嫌 lán toà Asiā ê 鄉親「及 in 無 sio siâng」,koh 嫌烏人烏,soah 無嫌 he 北 Bí 洲 ê 白人及 in「無 sio siâng」,既然 ánne,in beh 怎様講 in 無 teh 轉白人?

    話 nā 講倒轉,in nā 聴着「轉白人」cit 種話 to̍h 感覚 bē 爽,ánne siōng 好,希望 in 聴了 jú 來 jú bē 爽,一 ê soà 一 ê 起野心 beh 做頭家...

    因為番相信,lán nā 放 sak lán 公嬤 ê 傳統,he hoānsè 無要緊。M̄ koh 別人 ê 公嬤 ê 傳統 kám 会 kā lán io 飼?Kám 会 kā lán 囝孫 io 飼?

    「傳統」sī 動詞 neh!

    回覆刪除