(Haz clic aquí para leer la version castellana de este cuento -- la semana que viene.)

有一 pái ho͘ⁿh，金山番去 kàu 天下第四港深圳 choē 南島番、唐山番、蛮越番 sio 招 hâ 茶、lim 焼酒。四 ê 人 lóng tapo͘ ê。南島番及唐山番 kā 金山 ê 講，「全世界 lóng beh 過金山領 hitlō 青片（green card），等机会 gia̍h 手咒誓、変金山人，sī áncoáⁿ 独独汝 ánne『番在金山 m̄ cai 安』，起 kha to̍h soan 來 kàu 大海 ê 西 pêng 講 beh 企（khiā）cia？」

金山番講「姦，kám ài choân 一 ê 理由 hioh？Siān kah tòng bē tiâu beh 徙位...」Tú 好 hit cūn 南島番 ê 外甥 tiàm 人客庁 teh phah【GT 賽車】，賽車路頭一 pêng 山 tata，一 pêng 海深深，頂 koân 天無边無底，路边金毛 chio 母 hâ té 裙踏 koân 屐企 tiàm 棕樹 kha teh 看比賽... 油門 chui leh！內埔 iáu 有 kiáu 都 Labega teh sio 等，cán！蛮越番講「姦，目 ciu 有 peh hō͘ kim 無，金山 ánne 款仙境，siaⁿh 人放会離？人講 LA ho͘ⁿh，世間第五港，tī hia 天気好，妹 á súi，錢好 thàn，路頭闊。別人 beh 領青片領 bē 着 koh。」

金山番心肝頭 chia̍k 一下，心內 hiônghiông 想着 khah 早金山湾 ê 熱人（joa̍hlang），窗 á 外花開芳味四散，日子每日 tiⁿtiⁿ 浮浮... Beh 倒去 iáu 会赴，peh 起去飛船腹肚內睏一暝 to̍h sī，kàu 位先 mài kā 人報伊 sī 番 á，因為伊 sī 暗番 á，西裝 chēng chēng 腔口 khêng khêng，頭路 m̄ 驚 choē 無，隨時食会飽、chēng 会焼...

Oapiáng，tété ê 四五月日，想 bē kàu 金山番已經險 á bē 記得尾後 hit 段 bē 爽、tu̍hlān、bē giàn、孤単、塞車 bē 得 tháu、逐工 teh lòng 壁 ê 日子。M̄ ciah 來 tī cia kā 寫 hō͘ 坦白，後 pái to̍h mài 留戀金山留戀 kah tòng bē tiâu，無采頂回 ê 艱苦 soan 轉去 beh koh tī hia 企起。Ài 会記 leh，金山有 súi 物 mā 有 bái ê，譬喻族族 bētàng sio 濫，譬喻 tapo͘ 人 cē、cabó͘ 人看 koân m̄ 看下，譬喻黃 bah 種 ê kui 工 teh 扶紅毛 lān，thàn 錢消費支持白人 ê 媒体，翻頭 khàu 呻紅毛媒体対 in 無公平，ná khàu ná the̍h 錢 hō͘ 政府 thang 継続 thâi 外国人、積核能武器。

番無 beh koh kā 汝講 hiah'ê，kanna beh 問看汝 cai 無，第四港深圳 mā bēbái neh，雖然空気 bái，政壇假 ná 屎，官庁拗蛮禁止 o͘tóbái，m̄ koh kài 少 tī hia 族族 lóng sio chap、sio cham，社会焼 lō，cabó͘ gínná bē 嫌少，beh 轉去 Tâi'oân mā 緊緊 kàu。有緣無緣天注定，伸 ê hō͘ 咱人做咱行，有 tang 時 á 換 pênggá 來試看 māi mā bēbái。