Bat 問 Tâi'uân 及越南 ê 朋友 in 騎 o͘tóbái sī ántsuáⁿ 学会暁騎 ê。In m̄ lóng 感覚問了龜怪，逐 ê m̄ lóng 自來 tō 会暁騎 ê？

暗生番 sī 金山 gínná，自少年駛四 lián ê，m̄ bat 騎 o͘tóbái。有 lah，kanna 一 pái nāniā。三不五時真懷疑，bē 暁騎 o͘tóbái，暗番 beh ántsuáⁿ 做？Tsit 禮拜 m̄ tsiah 來 kàu Thài 国 ê 庄 kha 租車家己練習，発現暗生番 mā m̄ sī bē 暁騎 o͘tóbái，kanna 經驗 khah 欠 nāniā，真歓喜，四界走闖暢暢暢。第三工 tī 路边滑一倒，車掛人 kui ê siàng tī 塗 kha，佳哉無 tāitsì，衫褲 kài 勇 lóng 無破。Taⁿ tsitmá tsiah 瞭解，騎 o͘tóbái siōng 要緊 tō sī ài 驚，第二要緊 tō sī ài 敢，m̄ tsai ánne 講有着無？