番細漢時（細番時！）lóng 用衛生紙 tshit khatshng，自細漢 tō ánne tshit 慣勢 ah。照番所 tsai，四边 ê 人衛生 ê 需要 mā lóng ánne 處理 ê。聽序大人講 Huili̍ppin 人無用衛生紙，直接伸手落去處理，序大人 tshitshi tshuhtshuh sio 報講 tī Tâi 北有楼 átshù 電梯內 ê「ji̍h'á」lóng khihhō͘ Huili̍ppin 人糊 kah 全 lóng 屎！Tháiko kah 有夠 kah... 有影無影番 tō m̄ 敢講。

Lán 美麗島島內 the̍h 衛生紙 tshit khatshng tsit ê 習慣，m̄ tsai sī ùi hôlân 人、hōló 人時代 tsìn 前 tō 已經有 ê，ahsī ùi hit tsūn 開始 ê，ahsī ùi 日本時代、中国時代 khah 有 ê，m̄ koh 番発現 lán Tâi'uân 人生活 ê 習慣 tiāⁿtiāⁿ tuè Ingló 人（英佬人）tuè kah kài tiâu。Tú 好 Tâi'uân 人及 Ingló 人 lóng 屬 tī「紙族」ê，m̄ koh tī tsia sī teh 講漢化 ê Tâi'uân 人，原住民本底 ê 習慣番 tō m̄ tsai lah，等読者有閒來補充。

番走去 Hui 洲做穡 ê 時，工廠內有幾 nā ê Huili̍ppin 人 teh 管 hiah'ê 生產綫。番問頭家 Huili̍ppin hiahni̍h 遠，koh 頭家本身 mā m̄ sī Huili̍ppin 人，sī ántsuáⁿ 管綫 ê lóng 着倩 Huili̍ppin 人？頭家講，唐山人 mā 会暁管綫無 m̄ 着，m̄ koh 唐山人 nā 徙去 kàu Hui 洲 tō 完全鴨 á 聽雷 koh 無 saⁿh 会敢 hâm「番 á」交臿，生活逐項 m̄ tsiah 拜託頭家來 kā in tàu hua̍tlo̍h。所以倩唐山人加 khah 費気，倩 Huili̍ppin 人 khah 簡単。頭家 ê tsabó͘kiáⁿ hit tsūn tī hia teh 做総經理。伊 kā 番講，Huili̍ppin 人放屎放了無 teh 用衛生紙，kanna 用水洗。誠実 guán 便所內 lóng 有塑膠水桶 tshāi tī 屎桶边 á。聽人講用水洗 phīng the̍h 紙來 tshit khah 衛生。番想 bē 暁 tō 無 koh 想 ah。

Tsit 暫 á 來 kàu 暹羅（泰国）及 Málâi'iá，看 in ê 便所 tō tsai'iáⁿ tsia 人 mā 真 tsē lóng 無用衛生紙，用水 tshiâng khatshng ê，普通時 tī 壁內安裝水管、水鎗，kā la̍k tiâu、tshi̍h 落去 tō sī。甚至有 tang 時 á 客棧便所內無提供衛生紙 ，番 tsiah 來感覚，bēsái koh tshiân ahlah，tsún 講用水來 tshiâng 誠実衛生 koh 儉錢，tsit pái 番 tō beh 來 kā 試看会用得 bē。

Taⁿ tsitmá 番感覚，清気 sī 有影清気 lah，m̄ koh khatshng 不時 kā ak kah tâm loklok ê，ánne kám 好？聽講日本、高麗 hia tshiâng 水 ê 設備 khah 先進，会 tàng kā 汝 tshiâng 水 koh 会 tàng kā 汝 siàn hō͘ ta。

Koh 有，taⁿ tsitmá 開始瞭解 sī ántsuáⁿ 人講 kanna the̍h 衛生紙 tshit khatshng 其実無 kài 衛生。所以 m̄ tsai 後 pái lán 美麗島島內 sī m̄ sī 應該 tuè 着日本、高麗、Huili̍ppin ê 時行，改善 lán ê 衛生習慣。