暗生番가汝介紹LA(二):LA人에宗教生活(LA人 ê 宗教生活)



Bat 來去LA tshitthô、做 singlí 甚至過日子 ê 朋友 lóng 心內 teh 想,símmih 宗教生活,拜金拜銀拜大人,he tsiah sī LA鄉親 ê 信仰 ê 款式。(除去汝 nā 熟 sāi ê lóng 基督徒,koh in lóng tshuā 汝去 hâm 百分之百基督徒做陣。)無 m̄ 着 lah!M̄ koh nā beh 講 khah 好聽 leh,lán 着先講LA人拜 Iaso͘
ê siōng tsē,佔 kui ê LA県人口成七八十 pha koh 有伸,內底大部份 lóng 信天主教 ê,所以 teh 駛車 ê 時不時会看着人 ná 駛車 ná tī 胸坎前劃 hit ê 十字架求天公保庇,m̄ 驚天 m̄ 驚地,siōng 驚路 nih 車禍 tsē。

改革式基督教 tī LA mā 有真 tsē 人 teh 信,尤其高麗人 in lóng 信,汝 nā beh tī LA tshuē 着一 ê 高麗人 m̄ 信 Iaso͘ ê,包汝 tshuē kah phùi 血喝 m̄ 敢。華語(chino mandarín)族群 tī LA mā 真 tsē 信 Iaso͘ ê,tse ná 像 ài 看 in tuà tó 一角勢。Tī San Gabriel 河谷(唐 人 ê 大本營,華語俗稱東区,因為 tī 市中心東 pîng)nāsī tī 河谷東 kue̍h,ahsī tī 西 kue̍h 北半 kho͘(谷地大道 ê 北 pîng),hia lóng 講華語 ê khah tsē,人 mā khah 好額,gínná khah gâu 読册,ah kàisîng 每一口灶 lóng 加減信 Iaso͘,有 ê mînua 信,逐日祈祷読道理,有 ê tshìntshái 信信 leh,kā 当做 sī 一 ê 活動 thang 及人交陪。番甚至発現,河谷北 pîng 倚山 kha hit tah,nā beh hâm 唐人 ahsī 高麗人熟 sāi、交朋友,除去参加教会聚会以外 tō 無別項,kanna 轉去 tshù 孤 kiáⁿ teh 看舊年 ê 電影。


Ahnā 市中心(唐人街)hia ahsī San Gabriel 河谷西 kue̍h ê 南半 kho͘ hia(谷地大道 koh 落南),除去 Méhikò 人(墨西哥人)lóng 天主教徒 khah tsē 以外,唐人 teh 拜 Iaso͘ ê khah 無 hiah tsē,hit tah mā tú 好 lóng 講白話(廣府話)、越南話 khah tsē,人富 ê、sàn ê lóng 有,m̄ tsai in sī 因為 m̄ 信 Iaso͘ 所以事業 khah bē 旺,ahsī 後 pái in mā 会 thàn 大錢徙 ùi 東 kue̍h、信 Iaso͘ 送 gínná 読醫生!2005年 tī 唐人街起一間天后宮,sī LA唐人及越南人 ê 一 ê 文化中心,頭前廟名寫做三 ê 語言,有漢語 ê「天后宮」、越南語 ê「Chuà Bà Thiên Hậu」ahkah Ing 語 ê「Thien Hau Temple」。


Siōng 尾來講一層趣味 koh 心酸 ê tāitsì。番有一 ê 朋友 tuà San Gabriel 河谷西 kue̍h 北 pîng 倚山 kha ê 所在,in tau sī 中国舊滿州長春人,tuà LA已經 beh 二十冬 ah。Tsit ê 朋友 tsûn 年轉去長春 tshuā bó͘,舊年生 tsabó͘kiáⁿ,人変 khah tiām,piàⁿsè 食頭路飼 bó͘kiáⁿ。In lóng 無信 Iaso͘ 、無 teh 参加聚会。番 kā hit ê 朋友講 sńg 笑,「Ah lín tau,華人 tuà tsit tah suah 無 teh 信 Iaso͘ 参加聚会,外口 sī beh ántsuáⁿ 及人熟 sāi?」Hit ê 朋友無笑,應講,「無 lah,tsit 暫 á 有 teh 考慮 beh 参加教会 lah。」先 mài 講 símmih 妥当無妥当,ùi 基督教会 ê 角度來看,人 nā beh 去教会交朋友、及人熟 sāi,huānsè mā 無 saⁿh 特別無好。

沒有留言

敬請留話~