Tsit 幾年 tī Tâi'oân，人一直 teh tsèⁿ 看政府 beh 揀 tó 一套 lômá 字來寫北京話：中国 ê 漢語拼音？Ahsī Tâi'oân ê 通用拼音？Ahsī 清国時代 hit 套古早 ê、m̄ tsai 叫 símmih 名 hit 套？Tsit 禮拜，馬英九政府宣布講後 pái 全国逐 ê lóng 着用漢語拼音，beh 用別套 ê tō mài 想 beh 討錢。大條新聞 hioh，番 tī Krūngthép（Bāngkok）in tsia 報紙 mā 有 teh 報 tse。

聽講 iáu 有人 bē 爽 tse。番來想看 māi。北京？Lômá？！Beh the̍h saⁿh 款 lômá 字來寫北京話，Tâi'oân 人 beh 來 tsèⁿ tse sī beh tsèⁿ saⁿh？！！

Hō͘ 北京話 tī Tâi'oân tshāi kah 在在，he tāi 先 tō sī 国民黨 ê「堅持」。反対用漢語拼音來寫北京話，he tú 好 mā sī 国民黨 ê 精神，taⁿ suah tng 着国民黨 ê 頭人 teh 放 hō͘ 西瓜倚大 pîng，冷戦留 hō͘ 在野 ê 看 in kám 有 beh 去接接（tsihtsiap）。

話講倒轉，有人 beh 為 tse 來 siū 気，kiámtshái mā sī 好 ê，代表 lán 腹肚內 ê 火 iáu 大 pha。番 tútsiah 去網路頂 tshìntshái sa 幾 ā tè 相片 hō͘ 逐 ê 看：

正 pîng tsit ê 捷運站名，「楊厝港」寫做 lômá 字 hōló 文，逐 ê ioh tse sī tī símmih 城市？Sī m̄ sī 民進黨執政 ê 高雄市？Ahsī tuaⁿtiah ê 文化首都 Tâi 北市？当然 lóng m̄ 着，Tâi'oân ê 捷運站名哪有 teh 用 hōló 文寫 ê。Tse sī tī Singgapho͘ 。

Singgapho͘ 做会 kàu，高雄 mā 做会 kàu！站名、經济 lóng ánne。下 kha tsit ê 龙山堂邱公司，下 kha hit tsuā sī hōló 話 tàu ê，一下看 tō tsai'iáⁿ m̄ sī tī Tâi'oân、閩南，因為 hia lóng 定着 kā 寫做 símmih「Longshan」、「Lungshan」，譬喻 Bángkah hit 間「Longshan」寺 ahsī 「Lungshan」寺。

有人 tō sī beh tsèⁿ tsit ê「Lung-shan」、「Longshan」，m̄ koh，he 龙山明明寫做「LEONG SAN」mā sī kui 叢好好。Kám 講「龙山」一旦寫做「Leong San」，piàⁿ 読 mantalin 文（中国語 lah）ê hiah'ê kolē 旅客、紅毛 phāiⁿ'á 客 tō lóng phàng 見 tshuē 無路，去 Pin'eng（檳城／Pinang）tshitthô suah bē 赴拜訪邱公司？


檳榔嶼做会 kàu，美麗島 Tâi'oân 平平做会 kàu，後 pái 閩南 mā 做会 kàu。下 kha tsit 間銀行名 mā 寫做 hōló 話。Tse tō sī 豐隆銀行 ê 一間 lah。


汝 nā bat se̍h ùi Sing 州、Málai'iá，ahsī 瞭解銀行界，汝定着 tsai'iáⁿ tsit ê 豐隆 bē 細尾 ê。下 kha sī Singgapho͘ ê 豐隆大楼，相片 hip kah 無 kài 清楚，門 kha 口頂 kuân mā sī 寫「HONG LEONG BUILDING」，ah in 哪無寫「HONG LEONG TOA LAU」，he 番 tō m̄ tsai lo͘h。

Lán Tâi'oân 自早 kàu taⁿ to iáu 有 Liôngsan 寺，mā 有 Sîngkong 大学及 Tāmkang 大学，mā 有 Pang 寮及 Pang 桥，koh 有三重埔、Lô 水溪、Ta 溪等等，he lóng m̄ sī tshìntshái 烏白 phángpháng tō 会無去 ê。

Sī 講，除去淡江大学以外，人 nā kanna 読 he 边 á hit tsuā lômá 字，難免 in 看着 ê lóng 北京話。其実，番 m̄ 敢講 he lômá 字 ê tāitsì sī 真值得 tsèⁿ ah 無，m̄ koh，番 teh 想，beh tsèⁿ tō kuikhì tsèⁿ khah 大尾 ê，tsèⁿ hō͘ kolē 人 beh 去 Tâi'oân tshitthô ê 時 in ê 飛行機票 ài 寫「Kohiông」ahsī「Thôhn̂g」ahsī「Thô'iên」，ah in nā 坐捷運去 tī Bángkah 落車 ê 時 in 会看着 hit ê 月台頂 lóng 寫「Liongsan Temple」ah 甚至「룡산시」。Ánne 有 súi 気無？A̍h 有 saⁿh 無可能 ê？

Singgapho͘ 及 Pin'eng 做会 kàu，Bángkah、高雄及廈門哪做 bē kàu？Tâi'oân 人講有一寡芋 á teh kā giú 後 kha，Málai'iá ê hōló 人定着應講 in 已經 phāiⁿ kui 陣番 á、紅毛番及廣東人 phāiⁿ beh 成兩百冬 ah lóngmā 照起工 teh「ngài」（忍耐）... Tse m̄ sī 暗生番 teh kā lín 講 ê lah，sī in Málai'iá hōló 人 ê 気口，番学 hō͘ lín 聽 ê nāniā。