前幾工 tng 着一 tah 用 hōló 話寫 ê bôlo̍k（网誌），作者 sī Málai'iá Pin'nn̂g 嶼 ê 人，題目 to̍h sī Pin'nn̂g 嶼 ê「福建話」：http://www.penangdialects.com/。

有两点 tī Málai'iá 算真特别，to̍h sī cit ê 作者 m̄ nā bat 漢字，伊 koh 会曉 the̍h 漢字來寫 hōló 話。Koh 伊 the̍h lômá 字（伊所講 ê「紅毛字」）teh 寫 hōló 話 ê 時，伊拼 tàu ê 方式 kài 統一。伊基本上 sī 按照 málai 語 ê lômá 字 teh 寫，m̄ sī 白話字，m̄ koh cit 两項其実真 sio 倚，mā 真倚国際音標。

因為 cit ê 作者「Kee How」実在真 gâu 寫 hōló 文，hoānsè koh 因為伊已經 tī 下門 toà 一 cām ah，所以伊寫 ê 文章 lán Tâi'oân cit pêng ê 人生成 to̍h 会看有，本番免 kā 逐 ê 解說。独独有一寡語詞 Tâi'oân 人 nā 頭 pái tú 着難免讀 kah 霧 sàsà ê，譬喻：

「度攏」
＝「to͘lóng」＝拜託、tàu saⁿ 共、救命（siōng 無 tī málai 話內底有所有 ciah'ê 意思）... 着 lah，ce ùi málai 語來，原文 sī「tolong」。

「焦比」
＝「tapí」＝総 sī、m̄ koh... Ce mā sī ùi málai'á 話 hiaⁿh 來 ê，原文 to̍h sī「tapi」。

「庇能」
＝「Pineng」＝Pin'nn̂g 嶼... Ce sī 一種 khah 古早 ê 在地漢文寫法，看款 kiámchái siōng 早 sī 潮州人 kā 寫 ánne，因為「能」sī 阳平聲（第五聲）ê，tú 好潮州話 ê 阳平聲 sī koân koh 平。

「伊儂」
＝「ilâng」（ahsī「ilang」，本番 iáu m̄ cai）＝in... 潮州話 kah 真 cē 所在 ê hōló 話 lóng ánne 講 ê。

「哈物」
＝「hámi̍h」（聲調無 kài 確定）＝siaⁿhmi̍h... Ce sī 正港 ê 閩南話無 m̄ 着，m̄ koh tī Tâi'oân 無人 ánne 講。

Cit ê 作者実在不 lí'á 特别，伊本來真骨力想 beh 発展一套 lômá 字來寫 in hia ê hōló 話，m̄ koh citmá 伊顛倒感覺 the̍h「唐人字」來寫 hōló 話比 lômá 字 kohkhah 適当，伊 ê cit ê 想法有記載 tī cia：http://www.penangdialects.com/?p=21。甚至 taⁿ 伊 beh choē 適当 ê 漢字來寫 Pineng ê hōló 話內底 ê malái'á 話！Hit ê 想法有記載 tī cia：http://www.penangdialects.com/?p=26。

無論 lán sī 同意 ahsī 無同意伊 ê ciah'ê 想法，本番相信 lán 着 phah pho̍kgá kā 鼓勵，伊実在足有才情及志気！