Cit 暫 á tī tâi 語網有人 teh 討論 hōló 話 ê cit ê「読冊音」、「白話音」ê 現像。

Tī 美麗島教育界 mā 有人 teh cèⁿ 看中学生 ài 読華語文章 khah 好 ahsī 古早漢語文章 khah 好。

番会記得，几 nā 禮拜前 tī Senggâpho͘ beh choē 郵局來寄 phoe，看着一 ê 阿伯 to̍h 問伊，「借問一下，cia kám 有一間郵局？」伊聽無，叫番 koh 講一 pái，番 koh 講一 pái，伊 oânná 聽無，番 cai'iáⁿ 伊 m̄ sī bē 暁講 hōló 話，定着 sī「iûkio̍k」伊聽 khah 無，sūi 講半句 eng 語來解說。結果郵局 choē 有着，m̄ koh 番心內 teh 想，郵局 nā 無叫做郵局 sī beh 叫做 símmih？

後來問一 ê Mâlakkah 人 in hia 郵局 beh áncoáⁿ 講，ciah cai'iáⁿ in 講「phoe 館」。

「Phoe 館」！

番感覚，ánne 講 ciah sī hōló 話。

番頂回 se̍h ùi 閩南已經発見着 in hia lóng m̄ cai'iáⁿ「便所」sī saⁿh 貨，cit 斗 m̄ ciah 順 soà 問 cit ê Mâlakkah 人，in hia 便所 beh áncoáⁿ 講，ciah cai'iáⁿ in lóng 講「chiâng 水間」。Ah 汝 nā 嫌 cit ê 講法 siuⁿ 過好聽去，koh 有一 ê 講法 to̍h sī「放尿間」。

Phoe 館、chiâng 水間，ce m̄ ciah sī hōló 話。

頂回有一 pái 及人食飯，一 ê Senggâpho͘ 人，会暁講 hōló 話，koh 有一 ê Tâi 南 Kalí 人，轉大人 ciah 離開 Tâi 南 ê，hōló 話講了 liàn 轉。番 teh 問 hit ê Senggâpho͘ 人一寡 in hia ê 話，譬喻華語 ê「辣妹」，Mâlakkah 海峽 hōló 話講「chio 母」。Hit ê Kalí 小姐 to̍h kā Senggâpho͘ 人講，「Goán Tâi'oân 話講『美女』。」

Khah 拜託 leh。番講「哪有 ánne 講 ê！」番 koh 問 hit ê Senggâpho͘ 人，in hia sī m̄ sī 有 teh 講「sibe」，做「実在有夠...」ê 意思，伊講有 ah，he 読做「síbē」，to̍h sī hit ê 意思。He 二十三歲 Tâi 南小姐 to̍h 講，「Goán Tâi'oân 話 lóng 講『非常』。」

Soà 落去有一 pái kā 一 ê Tâi'oân 朋友報講 in Mâlakkah 海峽 hia 講「phoe 館」、「chiâng 水間」，漢番两人 lóng 感覚 in 南国 ê 講法 khah 合 hōló 話 ê 語感，m̄ koh hit ê Tâi 南小姐 hit cūn mā tī leh，伊講伊感覚「郵局」講了 khah 有理路，譬喻「郵票」mā 有用着 hit ê「郵」字。

無 m̄ 着 lah，伊 sī Tâi'oân 小姐，自細漢読華語冊，轉大人 koh 読 Tâi 大 hit 款第一等 ê 学校，hōló 話講了 m̄ sī 無 liàn 轉，m̄ koh 華語腔真重。番感覚 taⁿ ná 像 kui ê Tâi'oân ê cabó͘ gínná teh 講 hōló 話 ê 時 lóng kui chùi 華語腔，m̄ cai in kám 準做 ánne khah 有 cabó͘ 人 ê 気口。

番 teh 想，今年 Tâi'oân cabó͘ 人六七成投 hō͘ 馬候選人，kám hâm ce 無 tītāi。